فيه جنب البيت بيّاعة جرجيرعجوزة و ليا قرايبي ساكنين جنبي... مرة بتكلم معاهم عايزة انزل اجيب خضرة و مكنتش لسه جبت بنفسي من اي حد غالبا كنت بجيب الخضرة مع باقي الخضار بالتليفون او من عند الخضري فكنت بقولوهم عايزة اجرب الست اللي جنبنا دي ..قعدوا يقولولي اوعي دي ست بتزعق في الزباين و مش بتخليهم ينقوا و بتتعصب عليهم ..مسمعتش كلامهم و قلت اجرب .....
رحت
سلّمت و لسه بكشف الغطا اللي هي حطاه علي الخضار لقيتها بتقوللي انتي عايزة ايه؟ متنعكشيش اللي انا لسه
مرتباه قولي انتي عايزة ايه و انا اجيبهولك ...بصيت لها و انا بضحك ضحكة هبلة مش مستوعبة انها فعلا بتزعق فيا ...و هي
لسه مستمرة.. "قلت لك سيبي و قوليلي انتي عايزة ايه " ..حسيت اني لو
مسيبتش هتضربني ..قلت لها مش عايزة حاجة شكرا و رحت ماشية ...قعدت تنادي عليا خدي
خدي بس تعالي ..مشيت و قلت في سري مش هشتري من عندها تاني ده ايه المعاملة دي ...
مشيت
متنرفزة جدا لدرجة ان طول اليوم بفكر في الموقف ..بس انا بفكر فيه بطريقة معينة
انا مستغربة نفسي منين جوايا كنت عايزة انّفعها و منين غضبت و مشيت كده و كأن همنع
عنها رزقها .....لا لا متنسيش نفسك افتكري
دايما ان لا حيلة في الرزق و لا شفاعة في الموت ..افتكري دايما ان رزقك و رزقها
علي الله ..افتكري ان انتي لا هتمنّي ولا هتمنعي ده رزق ربك مقدره ...افتكري ان
اللي انتي فاكرة نفسك هتعلميها الادب و
انتي ماشية و سايباها قال يعني عايزة تفهميها ان ده مش اسلوب بيع و شرا حطي في
دماغك ان دي اكيد عند ربنا احسن منك 100 مرة ..عجوزة
شقيانة في عمر جدتك واقفة علي حيلها من 9 الصبح ل 5 المغرب عشان تبيع لكل
واحد بكتيره ب 5 جنيه لو حصلت اصلا و ده تحصل لو حد جاب خسيتين مثلا ...
فاكرة
نفسك افضل منها في اسلوبك ...لا لا ده انتي غبية قوي ..فين صبرك ؟ فين حلمك علي
الجاهل و الفقير ؟ فاكرة نفسك متعلمة و هي جاهلة ..انتي علمك منفعكيش في موقف بسيط
زي ده ..معرفتيش تتصرفي سبتي غضبك يتحكم ....فين كظم الغيظ....ما دي ابتلاءات
بسيطة قوي يومية بتعدي علي الواحد و لو ما
اخدش باله منها بيضيع الثواب و انتي مأخدتيش بالك و ضيعتي الثواب
فضلت
طول اليوم اكلّم في نفسي..عشان موقف بسيط زي ده ...تاني يوم رحت لها ..قالت لي
عايزة ايه ؟ قصدها يعني هشتري ايه ؟ رديت قلت لها اللي انتي عايزاه اللي هتقوليلي
خديه هاخده مش عايزة تديني حاجة مفيش مشكلة برده J ...
تاخدي
خس..تاخدي بقدونس ..عايزة جرجير..كنت بقولها هاتي هاتي كله هاتي اتنين من كل حاجة
..و انا ماشية مردتيش اخد الباقي فضلت تنادي خدي خدي اخدت الحاجة و جريت شكرا يا
حاجّة خلاص خلاص ..
الخضرة
غسلتها و نضفتها كويس و حطيتها في التلاجة قعدت معايا اسبوع عملت بيها سلطة كل يوم
...رحتلها بعد الاسبوع لقيتها مقابلاني ببشر و سرور علي وشها علي غير عادتها اخدت
طلبي و سبت الباقي راحت حطيتلي حزمتين زيادة من عندها ..شكرا يا حاجّة تسلم ايديك
سلام عليكم ...
بقي
فيه بينا تعامل اسبوعي و كل مرة نفس الموقف بقيت تستناني ....جت فترة يمكن قعدت
شهر منزلش من البيت اصلا و مبشتريش حاجة و
لما رحتلها لقيتها بتقوللي انا زعلانة منك مبتجيش ليه اتأخرتي عليا كده ليه ..و
لما اخدت طلبي سلمت عليا و قالت لي متتأخريش عليا..قلت لها عينايا حاضر ...
فخورة
بنفسي جدا عشان ..
·
حسيت اني ربّيت نفسي و اتغلبت علي كبري و صلّحت خطأ وقعت فيه في لحظة غضب
·
انا مسلمة و عندنا في القران
الكريم ايه بتقول "ادفع بالتي هي احسن فاذا الذي بينك و
بينه عداوة كأنه ولي حميم" يعني
خليك انت الكويس خليك انت احسن في التعامل متقابلش الاساءة بالاساءة ...متقابلش
العنف بالعنف و دي مش عداوة دي بس غباوة J
·
طوّلوا بالكوا علي الناس نحاول
دايما نعاملها باحسن مما بيعاملونا بيه عارفة انه صعب بس نحاول ..
·
قدّروا اللي واقف علي حيله و اتكسفوا منه لما تكونوا انتوا مريّحين قوي
بالنسبة له
الموقف ده انا بحكيه عشان عايزة كل واحد يحاول يراجع نفسه و تصرفاته مع
الناس كل واحد يبذل اقصي جهده عشان يتغير للاحسن ...الدين معاملة ...